కొరవడిన అధికారుల పర్యవేక్షణ
మంచినీటి కోసం అవస్థలు పడుతున్న ప్రజలు
ప్రత్యామ్నాయ మంచినీటి సౌకర్యం కల్పించాలని కోరుతున్న ప్రజలు
మహబూబాబాద్,సెప్టెంబర్ 26(పీపుల్స్ డైరీ)
భగీరథ నీళ్లు రాక మంచినీటి కోసం గార్ల మండల పరిధి,చిన్నకిష్టాపురం గ్రామం పంచాయతీ ప్రజలు అవస్థలు పడుతున్నారు.ప్రజల తాగునీటి కష్టాలు తీర్చేందుకు తీసుకువచ్చిన మిషన్ భగీరథ పథకం పై అధికారుల పర్యవేక్షణ కరువైంది.మిషన్ భగీరథ నీటి సరఫరా ఆగిపోయి చిన్నకిష్టాపురం దేశ్యతండా ప్రజలు తాగునీటి కోసం అవస్థలు పడుతుంటే అధికారులు స్పందించడం లేదని ఆరోపణలు వినిపిస్తున్నాయి. పొద్దాక కూలి పనులకు వెళ్లి సాయంత్రం ఇంటికి వస్తే పశువులకు తాగడానికి, ప్రజలకు స్నానాలకు కూడా నీళ్లు లేకపోవడంతో చిమ్మచికట్లలో బిందెలు, బకెట్లు పట్టుకొని కిలోమీటర్ల దూరం నడుచుకుంటూ బోరింగుల వద్ద నీళ్లు పట్టుకొని రావాల్సిన దుస్థితి ఏర్పడిందని ఆవేదన వ్యక్తం చేస్తున్నారు. భగీరథ పైపు లీకేజీల పేరుతో రోజుల తరబడి నీటి సరఫరా నిలిపివేయడంతో తాగునీటి కోసం అవస్థలు పడుతున్నట్లు ప్రజలు ఆవేదన వ్యక్తం చేస్తున్నారు.తక్షణమే ప్రత్యామ్నాయ మంచినీటి సౌకర్యం కల్పించాలని అధికారులను కోరుతున్నారు.