*అమ్మ మల్టీ స్పెషాలిటీ ఆస్పత్రిలో అనర్హులతో వైద్యం*:
ఆరోగ్యశ్రీ పేరుతో దోపిడీ?
పాయింట్ రహిత వైద్యం
– విలేకర్లు రాగానే జంప్ అయిన నకిలీ డాక్టర్!
వరంగల్ నర్సంపేట ఆగస్ట్ 22 (పీపుల్స్ డైరీ)
పేద ప్రజలకు నాణ్యమైన వైద్యం అందించాలనే లక్ష్యంతో ప్రభుత్వం ‘ఆరోగ్యశ్రీ’ పథకాన్ని అమలు చేస్తుంటే, కొన్ని ప్రైవేటు ఆస్పత్రులు మాత్రం దాన్ని కాసుల వర్షం కురిపించే వ్యాపారంగా మార్చుకున్నాయి. సదరు నర్సంపేట లో’అమ్మ మల్టీ స్పెషాలిటీ ఆస్పత్రి’లో అర్హత లేని వ్యక్తులతో వైద్యం చేయిస్తూ రోగుల ప్రాణాలతో చెలగాటమాడుతున్నారనే దిగ్భ్రాంతికర విషయాలు వెలుగులోకి వచ్చాయి.
*డాక్టర్ దర్శనం కరువు.. ఫిజియోథెరపిస్టే డాక్టర్!*
ఆస్పత్రికి వచ్చే రోగులను అసలు డాక్టర్లు సరిగ్గా చూడటం లేదని, కేవలం వచ్చి వెళ్లడానికే పరిమితమవుతున్నారని బాధితులు ఆరోపిస్తున్నారు. డాక్టర్లు ఇవ్వాల్సిన మందుల చీటీలు (ప్రిస్క్రిప్షన్లు) అర్హత లేని అసిస్టెంట్లు, చివరికి ఫిజియోథెరపీ చేయాల్సిన వ్యక్తులు రాస్తుండటం గమనార్హం. “ఫిజియోథెరపిస్ట్ మందులు రాస్తే మా రోగాలు ఎలా తగ్గుతాయి?” అని రోగులు, వారి బంధువులు తీవ్ర ఆగ్రహం వ్యక్తం చేస్తున్నారు.
*కెమెరాలు చూడగానే నకిలీ డాక్టర్ పరార్!*
ఆరోగ్యశ్రీ సేవల పేరుతో ఆస్పత్రి సిబ్బంది హడావుడి చేస్తూ బిల్లులు చేసుకోవడంలో ఉన్న శ్రద్ధ, రోగులకు సరైన వైద్యం అందించడంలో చూపడం లేదని తెలుస్తోంది. ఇక్కడి అక్రమాలపై బాధితుల నుండి సమాచారం అందుకున్న విలేకర్లు ఆస్పత్రికి చేరుకోగానే, అక్కడ వైద్యం అందిస్తున్న నకిలీ డాక్టర్ తట్టాబుట్టా సర్దుకుని అక్కడికక్కడే పరారయ్యాడు. ఈ విషయంపై ఆస్పత్రి ముఖ్య డాక్టర్ను వివరణ కోరగా, ఆయన పొంతన లేని సమాధానాలు చెబుతూ దాటవేసే ప్రయత్నం చేశారు.
*సిసి టీవీ ఫుటేజ్ పరిశీలించి చర్యలు తీసుకోవాలి:*
ఆస్పత్రి యాజమాన్యం తీరుపై స్థానిక ప్రజలు, బాధితులు మండిపడుతున్నారు. ఇప్పటికైనా జిల్లా వైద్య ఆరోగ్య శాఖాధికారి (DM&HO) వెంటనే స్పందించి, అమ్మ ఆస్పత్రిలోని సీసీటీవీ (CC TV) ఫుటేజ్ను స్వాధీనం చేసుకుని సమగ్ర విచారణ జరిపించాలని డిమాండ్ చేస్తున్నారు. అర్హత లేని వారితో వైద్యం చేయిస్తూ ప్రజల ప్రాణాలతో ఆడుకుంటున్న ఆస్పత్రి యాజమాన్యంపై, నకిలీ డాక్టర్లపై చట్టరీత్యా కఠిన చర్యలు తీసుకోవాలని కోరుతున్నారు.