రాంపూర్ ఐకెపి సెంటర్ లో వడ్లను వెంటనే తరలించాలి: సిపిఐ డిమాండ్

• రైతుల విజ్ఞప్తి మేరకు ఐకెపి కేంద్రాన్ని సందర్శించిన సిపిఐ బృందం
• మిల్లుల నిర్లక్ష్యంపై అధికారుల తక్షణ చర్యలకు విజ్ఞప్తి

నల్లబెల్లి, మే 31: పీపుల్స్ డైరీ 

నల్లబెల్లి మండలంలోని రాంపూర్ ఐకెపి (IKP) సెంటర్ లో కొనుగోలు ప్రక్రియ ముగింపు దశకు వచ్చినప్పటికీ, మిగిలి ఉన్న వరి ధాన్యాన్ని తక్షణమే మిల్లులకు తరలించేలా అధికారులు చర్యలు తీసుకోవాలని సిపిఐ జిల్లా కౌన్సిల్ సభ్యులు చింతకింది కుమారస్వామి డిమాండ్ చేశారు. రాంపూర్ ఐకెపి సెంటర్ లోని ధాన్యాన్ని సిపిఐ మండల కార్యదర్శి బట్టు సాంబయ్య, రైతు సంఘం మండల కార్యదర్శి మామిళ్ల పెద్ద ఐలయ్య, మండల నాయకులు పరికి కోర్నేలులతో కూడిన బృందం ఆదివారం పరిశీలించింది.

ఈ సందర్భంగా వారు మాట్లాడుతూ, ఐకెపి సెంటర్ లో సుమారు 20 మంది రైతులకు సంబంధించిన 3-4 లారీల వరి ధాన్యం కాంటాలు (తూకం) పూర్తయినప్పటికీ వారాల తరబడి అక్కడే మూలుగుతోందని ఆవేదన వ్యక్తం చేశారు.

మిల్లుల కొరత – రైతుల ఆవేదన:

ప్రభుత్వం ఈ ధాన్యాన్ని రాజుపేట సమీపంలోని హేమాత రైస్ మిల్లు, శనిగరం దగ్గర ఉన్న భార్గవి రైస్ మిల్లులకు కేటాయించిందని.. అయితే సదరు మిల్లుల నిర్వాహకులు “ధాన్యం నిలువ చేసుకోవడానికి స్థలం లేదు” అనే నెపంతో దిగుమతి చేసుకోవడం లేదని రైతులు సిపిఐ బృందం దృష్టికి తెచ్చారు. మిల్లులు నిరాకరించడం వల్లే లారీల్లోకి ధాన్యాన్ని లోడ్ చేయడం లేదని వారు వాపోయారు.

ప్రత్యామ్నాయ మార్గాలు చూడాలి:

ఇదే సమయంలో హరికృష్ణ రైస్ మిల్లుకు ఈ సెంటర్ నుండి ఐదు లారీల ధాన్యాన్ని పంపించినట్లు ఐకెపి నిర్వాహకులు తెలిపారని సిపిఐ నాయకులు పేర్కొన్నారు. కాబట్టి అధికారులు స్పందించి, ధాన్యాన్ని హరికృష్ణ రైస్ మిల్లుకు లేదా ఇతర ప్రత్యామ్నాయ మిల్లులకు తరలించేందుకు తక్షణ అనుమతులు మంజూరు చేయాలని ఉన్నతాధికారులకు విజ్ఞప్తి చేశారు. ప్రస్తుత వాతావరణ మార్పుల నేపథ్యంలో హఠాత్తుగా గాలులు, వర్షం వస్తే ధాన్యం తడిసిపోయి రైతులు తీవ్రంగా నష్టపోయే ప్రమాదం ఉందని వారు హెచ్చరించారు.ఈ కార్యక్రమంలో గ్రామ ఐక్య సంఘం నిర్వాహకులు బచ్చు మణమ్మ, చింతల స్వరూప, ఆవాల సరోజన, పొనుగోటి సమ్మక్కతో పాటు రైతులు ఆవాల సంపత్ రావు, బొజ్జ కవిత, వలి భాష, జి. సంపత్ రావు, పురం స్వామి, యస్. శ్రీనివాసరావు, కర్మిడ్ల అంతయ్య, ఎం. మాధవరావు, గుండు కె. సోమన్న తదితరులు పాల్గొన్నారు

నల్లబెల్లి మండలం రేలకుంట గ్రామంలో కాకతీయ, శ్రీ చైతన్య గ్రామైక్య మహిళా సంఘం (VO) నూతన భవన నిర్మాణానికి నర్సంపేట నియోజకవర్గ శాసనసభ్యులు దొంతి మాధవరెడ్డి ఘనంగా శంకుస్థాపన చేశారు. రూ. 10 లక్షల అంచనా వ్యయంతో నిర్మించనున్న ఈ భవనానికి ఆయన భూమిపూజ చేసి, పనులను ప్రారంభించారు.

గ్రామాల్లోని మహిళా సంఘాల బలోపేతానికి, మహిళలు ఒకచోట చేరి తమ ఆర్థిక ప్రణాళికలు, సమావేశాలు నిర్వహించుకోవడానికి ఈ సొంత భవనం ఎంతో సౌకర్యవంతంగా ఉంటుందని ఈ సందర్భంగా నాయకులు పేర్కొన్నారు. ఈ కార్యక్రమంలో నర్సంపేట నియోజకవర్గ, మండల మరియు గ్రామ స్థాయి కాంగ్రెస్ పార్టీ ముఖ్య నాయకులు, ప్రజాప్రతినిధులు, కార్యకర్తలు మరియు స్థానిక మహిళలు, ఐకేపీ (IKP) సిబ్బంది పాల్గొన్నారు.

నల్లబెల్లి మండలం ముచింపుల గ్రామంలో మహిళా సంఘం (VO) నూతన భవన నిర్మాణానికి నర్సంపేట నియోజకవర్గ శాసనసభ్యులు దొంతి మాధవరెడ్డి ఘనంగా శంకుస్థాపన చేశారు. రూ. 10 లక్షల అంచనా వ్యయంతో నిర్మించనున్న ఈ భవనానికి ఆయన భూమిపూజ చేసి, పనులను ప్రారంభించారు.

గ్రామాల్లోని మహిళలు ఆర్థికంగా, సామాజికంగా ఎదగడానికి, వారి సమాఖ్య సమావేశాలు మరియు ఇతర కార్యక్రమాలు నిర్వహించుకోవడానికి ఈ సొంత భవనం ఎంతగానో దోహదపడుతుందని ఈ సందర్భంగా నాయకులు పేర్కొన్నారు.ఈ కార్యక్రమంలో నర్సంపేట నియోజకవర్గ, మండల మరియు గ్రామ స్థాయి కాంగ్రెస్ పార్టీ ముఖ్య నాయకులు, ప్రజాప్రతినిధులు, కార్యకర్తలు మరియు స్థానిక మహిళా సంఘాల ప్రతినిధులు పెద్ద సంఖ్యలో పాల్గొన్నారు.

నల్లబెల్లి: నల్లబెల్లి మండలం అర్షన్ పల్లి (బోల్లోనిపల్లి) గ్రామంలో నూతన అంగన్‌వాడీ భవన నిర్మాణానికి నర్సంపేట నియోజకవర్గ శాసనసభ్యులు దొంతి మాధవరెడ్డి ఘనంగా శంకుస్థాపన చేశారు. రూ. 12 లక్షల అంచనా వ్యయంతో నిర్మించనున్న ఈ భవనానికి ఆయన భూమిపూజ చేసి పనులను ప్రారంభించారు.గ్రామీణ ప్రాంతాల్లోని చిన్న పిల్లలకు పౌష్టికాహారం, ముందస్తు విద్యను అందించడంతో పాటు గర్భిణీలు, బాలింతలకు మెరుగైన సేవలు అందించేందుకు ఈ నూతన భవనం ఎంతగానో ఉపయోగపడుతుందని ఈ సందర్భంగా నాయకులు పేర్కొన్నారు.ఈ కార్యక్రమంలో నర్సంపేట నియోజకవర్గ, మండల మరియు గ్రామ స్థాయి కాంగ్రెస్ పార్టీ ముఖ్య నాయకులు, కార్యకర్తలు, అనుబంధ సంఘాల ప్రతినిధులు మరియు స్థానిక ప్రజలు పాల్గొన్నారు.

నల్లబెల్లి మండలంలో వడదెబ్బతో మరణించిన వారి కుటుంబాలకు ప్రభుత్వం రూ.4 లక్షల ఎక్స్‌గ్రేషియా ప్రకటించినప్పటికీ, సరైన అవగాహన లేక ఒక్క కేసు కూడా ఇప్పటివరకు నమోదు కాలేదు. వడదెబ్బ మరణంగా గుర్తించేందుకు పోస్టుమార్టం నిర్వహించడం తప్పనిసరి. తహసీల్దార్, ఎస్సై, వైద్యాధికారి సభ్యులుగా ఉండే త్రిసభ్య కమిటీ నివేదిక ఆధారంగా పరిహారం మంజూరవుతుంది. అయితే సమాచారం లేక బాధిత కుటుంబాలు ముందుకు రాకపోవడంతో అర్హులు ప్రభుత్వ సాయానికి దూరమవుతున్నారని అధికారులు చెబుతున్నారు.