– జిల్లా కలెక్టర్‌కు ‘టీఎస్జేయూ’ వినతి
– నిర్మల్ జిల్లా నూతన కార్యవర్గం ఎన్నిక
– రాష్ట్ర అధ్యక్షులు పురుషోత్తం నరగౌని, ప్రధాన కార్యదర్శి తోకల అనిల్ నేతృత్వంలో కలెక్టర్‌తో భేటీ

నిర్మల్, జూన్ 10 (పీపుల్స్ డైరీ): జిల్లాలో అహర్నిశలు శ్రమిస్తూ ప్రజా సమస్యలపై వార్తా కథనాలు రాస్తున్న జర్నలిస్టుల సంక్షేమానికి ప్రభుత్వం, జిల్లా యంత్రాంగం పెద్దపీట వేయాలని తెలంగాణ స్టేట్ జర్నలిస్ట్స్ యూనియన్ (టీఎస్ జేయు) రాష్ట్ర కమిటీ కోరింది. బుధవారం నిర్మల్ జిల్లా కలెక్టర్ భవేష్ మిశ్రాను టీఎస్జేయూ రాష్ట్ర, జిల్లా నేతలు మర్యాదపూర్వకంగా కలుసుకున్నారు. యూనియన్ రాష్ట్ర అధ్యక్షులు డా. పురుషోత్తం నరగౌని, రాష్ట్ర ప్రధాన కార్యదర్శి తోకల అనిల్ కుమార్ ఆధ్వర్యంలో కలెక్టర్‌కు ఒక సమగ్ర వినతిపత్రాన్ని సమర్పించారు. జిల్లాలో పనిచేస్తున్న జర్నలిస్టుల పిల్లలకు స్థానిక కార్పొరేట్, ప్రైవేట్ పాఠశాలల ఫీజుల్లో 50 శాతం రాయితీ (కన్సిషన్) కల్పించేలా యాజమాన్యాలకు తగిన ఆదేశాలు జారీ చేయాలని ఈ సందర్భంగా కలెక్టర్‌ను కోరారు. దీనిపై కలెక్టర్ సానుకూలంగా స్పందించారు.

– నిర్మల్ జిల్లా నూతన కమిటీ ఎన్నిక

అంతకుముందు, నిర్మల్ జిల్లా టీఎస్జేయూ గత కార్యవర్గ కాలపరిమితి ముగియడంతో రాష్ట్ర కమిటీ పర్యవేక్షణలో నూతన జిల్లా కార్యవర్గాన్ని ఏకగ్రీవంగా ఎన్నుకున్నారు. జిల్లా నూతన అధ్యక్షుడిగా సిరిగే రమేష్, ఉపాధ్యక్షుడిగా గోగుర్ల సురేష్, జిల్లా ప్రధాన కార్యదర్శిగా రాహుల్ గౌడ్ ఎన్నికయ్యారు. నూతనంగా ఎన్నికైన నిర్మల్ జిల్లా బాధ్యులకు రాష్ట్ర అధ్యక్షులు పురుషోత్తం నరగౌని, ప్రధాన కార్యదర్శి తోకల అనిల్ కుమార్ శాలువాలు కప్పి, పుష్పగుచ్ఛాలు అందించి హృదయపూర్వక అభినందనలు తెలియజేశారు. ఈ సందర్భంగా జిల్లా నూతన అధ్యక్షుడు సిరిగే రమేష్ మాట్లాడుతూ, తనపై నమ్మకంతో ఈ బాధ్యతను అప్పగించిన రాష్ట్ర కమిటీకి కృతజ్ఞతలు తెలిపారు. నిర్మల్ జిల్లాలో పనిచేస్తున్న జర్నలిస్టుల హక్కుల సాధన కోసం, వారి కుటుంబాల సంక్షేమం కోసం నూతన కార్యవర్గం అహర్నిశలు పనిచేస్తుందని, యూనియన్ జెండాను జిల్లాలో మరింత బలంగా ముందుకు తీసుకెళ్తామని ఆయన స్పష్టం చేశారు. ఈ కార్యక్రమంలో యూనియన్ రాష్ట్ర, జిల్లా స్థాయి ముఖ్య నేతలు, వర్కింగ్ జర్నలిస్టులు పెద్ద సంఖ్యలో పాల్గొన్నారు.

– ప్రజల ఇబ్బందులు ప్రభుత్వానికి కనిపించడం లేదా..?

– బాంబులగడ్డ–లక్ష్మారెడ్డిపల్లి వరకు ప్రతిపాదిత బైపాస్

– గత ప్రభుత్వంలోనే పూర్తైన అనుమతుల ప్రక్రియ

– వెంటనే నిర్మాణ పనులు ప్రారంభించాలి

– రెండున్నరేళ్లుగా ముందుకు కదలని నిర్మాణ పనులు

– ట్రాఫిక్, ప్రమాదాల నివారణకు బైపాస్ అత్యవసరం

– లేకుంటే ప్రజలతో కలిసి ఉద్యమం తప్పదని హెచ్చరిక

– బీఆర్ఎస్ జిల్లా యువజన నాయకుడు పోరెడ్డి పూర్ణచంద్రా రెడ్డి

గణపురం, జూన్ 9 (పీపుల్స్ డైరీ):

జిల్లా కేంద్రం భూపాలపల్లిలో ట్రాఫిక్ సమస్యలకు శాశ్వత పరిష్కారంగా ప్రతిపాదించిన బైపాస్ రోడ్డు నిర్మాణం ఇప్పటికీ ప్రారంభం కాకపోవడంపై బీఆర్ఎస్ నాయకులు తీవ్ర అసంతృప్తి వ్యక్తం చేస్తున్నారు. గత ప్రభుత్వ హయాంలో మంజూరై, అన్ని రకాల పరిపాలనా అనుమతులు పొందిన ఈ ప్రాజెక్టు కాంగ్రెస్ ప్రభుత్వం అధికారంలోకి వచ్చిన తర్వాత ముందుకు కదలకపోవడంపై గండ్ర యువసేన జిల్లా అధ్యక్షుడు, బీఆర్ఎస్ జిల్లా యువజన నాయకుడు పోరెడ్డి పూర్ణచంద్రారెడ్డి తీవ్రంగా స్పందించారు. ప్రజల అవసరాలకు సంబంధించిన కీలక ప్రాజెక్టులను రాజకీయ కోణంలో చూడడం సరికాదని, జిల్లా అభివృద్ధికి సంబంధించిన పనులను తక్షణమే ప్రారంభించాలని డిమాండ్ చేశారు. మంగళవారం ఆయన మాట్లాడుతూ… గత బీఆర్ఎస్ ప్రభుత్వంలో అప్పటి ఎమ్మెల్యే గండ్ర వెంకటరమణా రెడ్డి ప్రత్యేక చొరవతో భూపాలపల్లి జిల్లా కేంద్రానికి బైపాస్ రోడ్డు మంజూరు చేయించారని గుర్తు చేశారు. భూపాలపల్లి బాంబులగడ్డ నుంచి గణపురం మండలం లక్ష్మారెడ్డిపల్లి వరకు నిర్మించనున్న ఈ బైపాస్‌కు అవసరమైన ఆర్థిక, రెవెన్యూ అనుమతులతో పాటు ఇతర శాఖల ఆమోదాలు కూడా లభించాయని తెలిపారు. ప్రాజెక్టు అమలుకు అన్ని అడ్డంకులు తొలగిపోయినప్పటికీ, ప్రస్తుతం పనులు ప్రారంభం కాకపోవడం వెనుక కారణాలను ప్రభుత్వం ప్రజలకు వివరించాలని డిమాండ్ చేశారు. భూపాలపల్లి జిల్లా కేంద్రం రోజురోజుకూ విస్తరిస్తోందని, వాహనాల సంఖ్య గణనీయంగా పెరుగుతోందని ఆయన పేర్కొన్నారు. ముఖ్యంగా భారీ వాహనాలు పట్టణం గుండా ప్రయాణించడం వల్ల ట్రాఫిక్ సమస్యలు తీవ్రంగా మారుతున్నాయని, విద్యార్థులు, ఉద్యోగులు, వ్యాపారులు, సాధారణ ప్రజలు నిత్యం ఇబ్బందులు ఎదుర్కొంటున్నారని ఆవేదన వ్యక్తం చేశారు. అత్యవసర సేవలకు సంబంధించిన అంబులెన్సులు, అగ్నిమాపక వాహనాలు కూడా ట్రాఫిక్‌లో చిక్కుకునే పరిస్థితులు ఏర్పడుతున్నాయని అన్నారు. పట్టణంలో ట్రాఫిక్ ఒత్తిడి పెరగడంతో పాటు రోడ్డు ప్రమాదాల సంఖ్య కూడా అధికమవుతోందని ఆయన పేర్కొన్నారు. బైపాస్ రోడ్డు అందుబాటులోకి వస్తే భారీ వాహనాల రాకపోకలు పట్టణానికి వెలుపలికి మళ్లి, ట్రాఫిక్ సమస్యలు తగ్గడంతో పాటు ప్రమాదాల నివారణకు కూడా దోహదపడుతుందని వివరించారు. ప్రజల ప్రాణాలకు సంబంధించిన అంశంలో ప్రభుత్వం నిర్లక్ష్యంగా వ్యవహరించడం తగదని, అభివృద్ధి పనుల విషయంలో రాజకీయ కక్షసాధింపులకు తావు ఉండకూడదని అన్నారు. గత ప్రభుత్వం తీసుకొచ్చిన ప్రాజెక్టులను పక్కనపెట్టి ప్రజలను ఇబ్బందులకు గురిచేయడం సరికాదని పేర్కొన్న ఆయన, భూపాలపల్లి ప్రజలు ఎన్నాళ్లుగానో ఎదురుచూస్తున్న బైపాస్ నిర్మాణాన్ని వెంటనే ప్రారంభించాలని డిమాండ్ చేశారు. స్థానిక ఎమ్మెల్యే ఈ అంశంపై స్పష్టత ఇచ్చి, పనులు ఎప్పుడు ప్రారంభమవుతాయో ప్రజలకు వెల్లడించాలని కోరారు. ప్రజా ప్రయోజనాలను దృష్టిలో ఉంచుకుని ప్రభుత్వం తక్షణ చర్యలు తీసుకోకపోతే బీఆర్ఎస్ పార్టీ ప్రజలతో కలిసి ఉద్యమ బాట పడుతుందని, ఆందోళన కార్యక్రమాలను మరింత ఉధృతం చేస్తామని పోరెడ్డి పూర్ణచంద్రారెడ్డి హెచ్చరించారు. భూపాలపల్లి అభివృద్ధికి కీలకమైన బైపాస్ రోడ్డు నిర్మాణం ఇకపై మరింత ఆలస్యం కాకుండా వెంటనే పనులు ప్రారంభించాలని ఆయన డిమాండ్ చేశారు.

“ఒక్క మొక్క.. ఎన్నో ప్రాణాలకు అండ”

– పర్యావరణ పరిరక్షణలో భాగస్వాములు కావాలి

– కేటీపీపీలో మొక్కలు నాటిన సిఈ శ్రీ ప్రకాష్

*గణపురం, జూన్ 05 (పీపుల్స్ డైరీ):*

పర్యావరణ పరిరక్షణ ప్రతి ఒక్కరి సామాజిక బాధ్యత అని, భావి తరాలకు స్వచ్ఛమైన వాతావరణాన్ని అందించాలంటే విస్తృతంగా మొక్కలు నాటాల్సిన అవసరం ఉందని కాకతీయ థర్మల్ పవర్ ప్రాజెక్టు (కేటీపీపీ) చీఫ్ ఇంజినీర్ శ్రీ ప్రకాష్ అన్నారు. ప్రపంచ పర్యావరణ దినోత్సవాన్ని పురస్కరించుకుని శుక్రవారం మండలంలోని చెల్పూర్ గ్రామంలోని కేటీపీపీ ఆవరణలో ఘనంగా మొక్కల పెంపకం కార్యక్రమాన్ని నిర్వహించారు.

ఈ కార్యక్రమానికి ముఖ్య అతిథిగా హాజరైన చీఫ్ ఇంజినీర్ శ్రీప్రకాష్ మొక్కలు నాటి కార్యక్రమాన్ని ప్రారంభించారు. ఈ సందర్భంగా ఆయన మాట్లాడుతూ… పెరుగుతున్న కాలుష్యం, వాతావరణ మార్పుల ప్రభావం మానవాళికి సవాలుగా మారిందని పేర్కొన్నారు. పర్యావరణ సమతుల్యతను కాపాడుకోవడంలో చెట్లు కీలక పాత్ర పోషిస్తాయని, ప్రతి వ్యక్తి కనీసం ఒక మొక్కను నాటి దానిని సంరక్షించే బాధ్యత తీసుకోవాలని సూచించారు. పరిశ్రమల అభివృద్ధి దేశ ఆర్థిక ప్రగతికి అవసరమైనప్పటికీ, అదే సమయంలో పర్యావరణ పరిరక్షణకు ప్రాధాన్యత ఇవ్వాల్సిన అవసరం ఉందన్నారు. కేటీపీపీ పరిసర ప్రాంతాలను మరింత హరితమయం చేసేందుకు ప్రత్యేక కార్యాచరణ చేపడుతున్నామని, మొక్కల పెంపకం కార్యక్రమాలను నిరంతరం కొనసాగిస్తామని తెలిపారు. కార్యక్రమంలో అధికారులు, ఉద్యోగులు, సిబ్బంది ఉత్సాహంగా పాల్గొని మొక్కలు నాటారు. పర్యావరణ పరిరక్షణపై అవగాహన పెంపొందించేలా ప్రతిజ్ఞ చేశారు. కార్యక్రమం అనంతరం మొక్కల సంరక్షణపై ఉద్యోగులకు సూచనలు చేశారు. మొక్కలు నాటి… భూమిని కాపాడుదాం అనే సందేశంతో నిర్వహించిన ఈ కార్యక్రమం అందరిలో పర్యావరణ చైతన్యాన్ని పెంపొందించింది. ఈ కార్యక్రమంలో కేటీపీపీ అధికారులు, ఇంజనీర్లు, కార్మికులు, సిబ్బంది పాల్గొన్నారు.